SuperManager x. 10: mudar a historia

Despois desta xornada teremos un descanso polos partidos de seleccións.

Balance da xornada anterior

Balance de la jornada anterior

Seguen a ser xornadas con resultados bastante dispares nos meus equipos (creados coa listaxe que dou cada semana no blog). Esta vez houbo máis subas ca baixadas. O meu mellor segue unha tendencia ascendente (comezou a tempada no 38 mil). Se a semana pasada entrara no Top 1000, esta fíxoo no Top 500 (414º). Desta volta non tiven tanto tino nos cambios: só gañei 9 puntos. Recuperar posicións vai estar cada vez máis caro. No persoal, estamos a chegar ao punto crítico do xogo, porque nos últimos anos o meu mellor momento está a chegar precisamente nas últimas xornadas da fase de acumulación e nas inmediatamente posteriores (o ano pasado ascendín á segunda posición, tiña algún equipo máis entre os mil primeiros e incluso o equipo do blog rozaba o Top 1000). Esta décima adoita marcar un cambio negativo de tendencia; o reto agora é mudar a historia.

Desta volta un dos xuíces da xornada foi Javi Beirán, un xogador moi vendido. Eu dixen que non era dos cambios prioritarios, pero se a alguén lle sobraba un podía contemplalo. Por fortuna, tiña cambios máis urxentes e conserveino nos meus equipos. Respecto a Tavares ou Llull, que aparecen na listaxe, dixen que non contemplaba a ninguén do Madrid para os meus equipos pola incerteza que os rodea. Mantendo a Beirán e sen os do Madrid, a listaxe aproba. Se quedamos con Tavares e vendemos a Beirán, entón tocaba baixar un pouco.

Selección da xornada

Selección de la jornada

A lenda é a seguinte: resaltados van os xogadores que son cota e de vermello os extracomunitarios. Podédesme seguir no Twitter para estardes ao tanto de novos artigos e de calquera modificación deste, se a houber.

La leyenda es la siguiente: en negrita van los jugadores que son cupo y de rojo los extracomunitarios. Me podéis seguir en Twitter para estar al tanto de nuevos artículos y de cualquier modificación que pudiera tener este.

Xa en xornadas anteriores dicía que a miña preferencia era deixar os xogadores do Madrid e, en menor medida, os do Barça á marxe pola incerteza que implican. Esta, enfrontándose ambos, o conto non é diferente. Non vexo opcións fiábeis. Tavares non fixo ningún gran partido contra o Barça des que está no Madrid; Facu tampouco acadou a decena contra eles nos partidos da pasada ACB. Coido que é risco de máis, incluso se Llull non chega, pensar nel coas opcións que hai nos bases. Pola parte do Barça, Tomic adoitaba ser unha grande opción contra os brancos, mais o ano pasado non logrou superar a vintena contra eles en ningunha competición. Agora ben, se nos conformamos cun partido seu arredor da quincena, seguramente si que o dea, porque o curso pasado tampouco baixou da decena en ningún dos cinco encontros contra o Madrid. A Heurtel o Madrid era un rival que tradicionalmente se lle daba mal. O curso pasado, como única referencia do Barça no base, entre Euroliga, Copa e ACB tivo un pouco de todo. Vén no mellor momento do ano, así que, sobre todo se apañastes as súas últimas tres grandes valoracións, podedes manter a aposta. Á hora de fichar, decantaríame por xogadores con menor incerteza.

En canto á distribución de bandeiras, como non vexo opcións fiábeis nos bases, contemplo dúas combinacións: 3 ás e 1 pivote ou 2 e 2 (incluso o 0-3-2 semella boa idea esta semana).

Bases

Nas opcións prioritarias non hai ningunha sorpresa. Os catro bases máis caros (sen contar a Llull) son os máis interesantes esta xornada, por máis que os tres que estaban sans valoraran por debaixo do esperado a semana pasada (curiosamente, o tocado McCalebb fixo o seu tope da tempada). Parece que as dúbidas veñen sobre todo con Ennis, polo seu 2 e porque xa deixou de dar cartos. Porén, inda nun mal partido a xornada pasada anotou 15 puntos e xogou moitos minutos. Ademais, ten un calendario inmellorábel: saídas a Fuenlabrada, Valencia e partido como local contra o GBC. Todos eles son dos peores equipos na defensa do escolta (lembro que Ennis non está a xogar de base). Así que nada de vendelo. Con Renfroe non hai dúbida ningunha. O terceiro posto está entre Lapro e McCalebb. O ano pasado non coincidiron, na ida Lapro inda non chegara á Penya (2 de Bo) e na volta o que non estaba era o estadounidense (33.6 de Nico). Co bo precedente de Lapro en Zaragoza e que curiosamente ambos os dous están a valorar moito mellor fóra da casa, coido que o arxentino ten vantaxe (tamén penso que a vitoria da Penya é algo máis probábel).

Se non temos cartos para tres dos catro anteriores, Albicy vólvese presentar como mellor opción económica. O do semana pasada hai que tomalo como un accidente, volveu facer un gran partido nesta na EuroCup e vén nun moi bo momento de forma. O calendario para el tamén é moi favorábel. Outra opción, inda que máis incerta, pode ser Van Rossom. O belga segue a saírse en Europa (outro 25 esta semana), pero non acaba de dar ese mesmo nivel na ACB (sobre todo fóra da casa, onde non acadou aínda a decena). Por fortuna, véñenlle dous partidos seguidos de local (22.8 e 14.4 nas dúas últimas xornadas), así que parece o mellor momento para pensar nel.

Se buscamos unha diferenciación, o home é Brian Roberts. Despois dun comezo por debaixo do esperado, destapouse a xornada pasada cun partido na trintena e nesta superou a vintena en Europa. As estatísticas din que o Murcia é a peor defensa a domicilio dos bases, pero non son fiábeis: só leva tres partidos a domicilio (o que menos na ACB, polo aprazado contra o Estu) e dous deles foron contra equipos de Euroliga. De local os vermellos están a ser a mellor defensa dos bases. Trátase dunha opción de risco. Ningunha bandeira me parece boa opción, mais se quedastes sen cambios e inda tedes a Pérez no equipo, o Valencia está a ser amábel cos uns contrarios. Esta semana Huertas queda fóra, porque lonxe de Vitoria está a baixar bastante os seus números. Fóra da listaxe e para cazaxornadas, apunto o nome do acabado de chegar Radicevic, que coa lesión de Hannah disporá de bastantes minutos.

Ás

Aleros

Nesta xornada, como sucedera hai un par con McFadden, chegoulle o tempo de saír a Brizuela. Os seus minutos e importancia seguen a minguar trala chegada de Gentile e non teñen un partido doado en Gran Canaria. Grazas pola achega de broker e até a próxima (seguro que volverá contar ao longo da tempada). Iso reduce o grupo de ás comúns a tres: J. Fernández, o MVP Beirán e Dawson. Os tres con boa xornada por diante.

Onde se gañaran ou perderán puntos será na cuarta á. Este ano si que semella o do despegue de Marc Garcia. É todo talento en ataque e a lesión de Popovic obrigarao a asumir máis protagonismo. Acadou a vintena na metade dos seus partidos, está a bo prezo e asegura cando menos un par de subas substanciosas. Ademais, xunta dous partidos na casa. Outra opción, menos económica, é o esloveno Cancar. Acumula cinco xornadas por riba da decena e xoga de local (como varios dos seus compañeiros, aumenta a súa valoración de forma apreciábel á calor dos seus seareiros). A opción para nos diferenciarmos é Toolson. Xoga na casa contra un Breo que lonxe de Lugo é menos competitivo e dá moitas facilidades na posición. Ademais, ao sobriño de Andy quédalle un moi bo calendario por diante: Fuenlabrada (4 ás por riba dos 20 contra eles no que vai de curso) e Zaragoza (9 por riba da quincena esta tempada), este como local.

Como opcións de risco apunto tres. Gentile está a xogar minutadas e veu ao Estu para gañarse un gran contrato noutro lado (como antes Jackson ou Landesberg). A medio prazo debería converterse nunha das opcións prioritarias. As súas grandes valoracións non tardarán en chegar e igual os managers máis audaces teñen sorte e pescan a primeira esta semana. Tamén me parece interesante o seu par Chris Evans. O italiano está a permitir xornada tras xornada grandes valoracións dos seus rivais (Dawson, Seibutis/Okoye e Hanga). Se estivésemos a ver o Evans de principio de tempada, non tería dúbidas e sería opción de primeiro banzo. O problema é que o norteamericano non está ben e anda a perder peso na ofensiva amarela. Porén, por características, paréceme o xogador que máis dano lle pode facer a Gentile. Como última opción de risco, outro italiano: Vitali. Semella que volve atopar sensacións e o rival é favorábel. Porén, xa sabemos que cando menos o esperemos regalaranos un negativo. No Zaragoza seguro que algunha á o fará ben, mais non son capaz de decidirme entre Berhanemeskel (que vén dun partido inmenso), Seibutis ou Okoye; así que non entra ningún. E o mesmo me pasa coas ás do Valencia.

Pivotes

Pívots

Como nas ás, hai tres xogadores que destacan sobre os demais: Shengelia, Dubljevic e Thompson. Toko é fixo, así que non hai nada que comentar. De Dubi dixen que a semana pasada era a derradeira na que nos podiamos permitir non levalo; inda así, a pesar da contundente derrota taronja, fixo un meritorio 18. Agora, cun Valencia en urxencias e dous partidos seguidos de local (case 24 de media na Fonteta e nas dúas últimas arredor dos 40), temos que facerlle sitio como sexa. Thompson na casa aumenta moito as súas prestacións e ademais atópase nun gran momento.

O cuarto pivote será o que marque as diferenzas. Aí destacan dúas opcións que deberían dar puntos e cartos. Shermadini, após dúas xornadas nas que non chegou á valoración esperada, destapouse cun partido preto dos 40. Esta semana, de local e contra unha das peores defensas interiores (Murcia), ten unha oportunidade de sumar a súa terceira gran valoración seguida (fixo 24 esta semana na EuroCup). A pega con el? O Unicaja ten unha boa rotación interior —o xeorxiano rara vez supera os 20 minutos de xogo—, co que se o que está inspirado é outro compañeiro… Con menor opción de pico pero tamén con menos risco de tropezo, temos a Marko Todorovic. O montenegrino deu unha exhibición no primeiro tempo da última xornada, tanto en defensa como en ataque. Fixo de todo e todo ben. Ía camiño da trintena nunha vitoria cómoda da Penya. A segunda parte foi un filme de terror para a afección do Joventut: nin os xogadores nin o corpo técnico deron unha a dereitas e a gran xornada de Todorovic quedou só nunha boa valoración sen bono. Se a Penya aprendeu a lección, en Zaragoza, nun partido fundamental para as aspiracións copeiras de ambos equipos, Marko debería volver destacar. Está moito mellor de forma, non vai baixar da vintena de minutos e ofrece cousas que non teñen outros pivotes dos equipos do nivel do Joventut. Se alguén está a ser consistente no xogo interior do Unicaja, ese é Carlos Suárez. Garante, cando menos, unha vintena de minutos, leva catro xornadas sen baixar da quincena de valoración, ten un rival favorábel, de local os seus números medran bastante e debería apañar o bono. A continuación non teño máis remedio que nomear a Abromaitis. É o pivote máis valorado das últimas tres xornadas e encadea dúas por riba dos 25. Ademais, a visita a Burgos é favorábel. O problema con el é que non se trata do xogador máis consistente e, á volta do descanso, vai a Barcelona. Eu non lle vou a dar entrada porque non acerto nunca con el, mais non teño razóns obxectivas para non incluílo no segundo banzo esta semana. Gústame máis o seu compañeiro Iverson. Está a se mostrar máis consistente e nas dúas últimas saídas superou a vintena.

Gerun está a facer os seus mellores partidos fóra da casa e en Manresa ten un rival favorábel. Á volta repite fóra, mais o rival é o Baskonia. Nas últimas xornadas estamos a ver o Jankovic da pretempada. Leva tres partidos en 15 ou máis de valoración, os seus minutos están a medrar (35 na última) e non ten mal calendario por diante. Moussa Diagne estaba en moi bo momento e nesta tiña unha xornada para destacar, mais anda con problemas físicos e tanto a semana pasada coma esta na EuroCup apenas xogou. O irregular Lalanne ten un bo partido por diante esta semana contra o xogo interior do Breo. Xa fóra da listaxe e como opción para cazaxornadas, podemos contemplar ao seu compañeiro Doellman. Perdeu as seis primeiras xornadas por lesión e nalgún momento terá que despegar. Esta, diante do seu público e cun rival accesíbel, é unha boa oportunidade para que suceda. O que tamén me dá a sensación de que dun momento a outro a vaina partir é Whittington. Will Thomas inda está en moitos equipos, xoga de local e contra un rival favorábel, así que os que anden faltos de cambios poden aguantalo unha semana máis. Esta xornada na EuroCup superou a quincena e xogou case 30 minutos (mais foi porque Tobey fixo 3 faltas nun minuto e despois apenas xogou). Jordan ten que saír dos equipos: fóra valora peor e ademais a xornada pasada non vin que o Breo o busque en ataque.

O equipo do blog

El equipo del blog

Andrómenas segue a subir: 141.6 puntos e por vez primeira entra no Top 20000 (18953º). Porén, non teño moi claro que os case 3 mil postos gañados se traduzan en realidade nunha aproximación en canto a puntos ao Top 1000. Así que vou ir rexistrando a diferenza estimada en puntos co obxectivo para ter en diante unha referencia máis fiel. Coido que o equipo que marcha no milleiro agora debe de andar polos 1337 puntos, así que estou a uns 174 puntos do Top 1000. Aínda é unha distancia enorme.

Esta semana teño os cambios claros. Saen Brizuela, Will Thomas e Jordan e entran Marc Garcia, Dubi e Todorovic.

Material gráfico utilizado: a imaxe da cabeceira pertence ao filme Back to the Future (Robert Zemeckis, 1985).