Bromas á parte, non fai falla dicir que os adestradores, pola conta que lles ten, xestionan os seus xogadores para tentar gañar, non para compracer os xogadores do SM. Esas decisións imprevisíbeis dentro dos parámetros do SuperManager teñen unha razón deportiva.
A primeira das dúas xornadas desta semana preséntase con bastante variábeis, iso sempre lle outorga maior interese ao xogo.
Os bases non ofrecen as mellores perspectivas esta semana. Acertar no terceiro e na decisión de ir con dúas bandeiras ou non antóllanse como unha das chaves da xornada.
Dúas xornadas consecutivas superando os 20 de valoración, visita da Penya, ausencia de Campazzo, unha bandeira que ofrece certezas… Luka Doncic segue dentro.
A fin de semana vimos en Gran Canaria a versión máis terreal de Thomas Heurtel, que non chegou á quincena a pesar de superar outra vez as dez asistencias. Agora regresa ao Palau, onde está na vintena de media, contra un Betis que é das peores defensas dos bases, mais sube o nivel fóra da casa, onde se sitúa entre as que menos conceden. Non debería ser atranco para o francés, que na ida fixo un 20.4. Na segunda xornada da semana, terá que visitar Málaga e entón a súa presenza xa non será obrigatoria.
Esta fin de semana volvemos ver a mellor versión de Clevin Hannah en Sevilla. O Murcia está a se achegar a posicións de playoff e enfróntase a un rival directo en caída libre. O Fuenla suma xa 3 derrotas consecutivas e non é un gran defensor dos bases —29 na ida, sen bono—. Hai un par de semanas, outro base anotador, Booker, deu un pico contra os fuenlabreños. A dúas xornadas é menos interesante, o Granca non está a conceder picos na casa, nin sequera o logrou Heurtel a última xornada.
Por dar algunha bandeira, Rodrigo San Miguel leva catro partidos sen baixar da decena e como local a súa media medra máis de 6 puntos. O rival é favorábel, GBC, aínda que non ten un bo precedente: -5 na ida. Para a fin de semana pinta peor, visita Vitoria.
Nico Laprovittola volveu ter o fado da Penya nas súas mans e volveu guiar os verdinegros á vitoria na mellor xeira da tempada: 2 triunfos consecutivos (co que foi este club…). Tamén marcou o máximo da tempada: 33.6. Contra o Madrid volverá ter a pelota e a responsabilidade, pero os brancos son a mellor defensa, así que, agás que queiramos arriscar, cómpre apostar por opcións máis fiábeis. A fin de semana, contra o Bilbao, si que pinta a opción prioritaria e a posíbel recambio de Heurtel.
A fiabilidade de Jaime Fernández xa non semella ser tal, leva 5 xornadas sen acadar a quincena e repite fóra da casa —media de menos de 12.5—. Inda que no global o Burgos é das peores defensas dos bases, a cousa mudou bastante nas últimas xornadas, onde está entre as mellores. A opción lóxica é darlle un descanso —inda que non descarto unha boa valoración pola súa parte—. A fin de semana, contra o Estu na casa, xa presenta outro atractivo.
Bellas viaxa, polo que, segundo lle están a ir as últimas saídas, tampouco é opción de bandeira. Cook tiña unha xornada propicia como local contra o Bilbao Basket e non acadou a decena. Non paga a pena pensar nel para equipos da xeral, inda que volva ter un rival propicio no Zaragoza que o pode facer interesante para cazaxornadas. Como opción de risco podemos pensar en Radicevic. Estivo fantástico contra o Barcelona e o rival, Bilbao Basket, é dos máis amábeis. O problema é que fóra da casa non acaba de render, só en Fuenlabrada, e co bono, superou a quincena. No festival triplista de récord en Donostia, Sergi García conseguiu a súa primeira gran valoración cos taronja. Podemos pensar nel como opción de alto risco. Enfróntase a un Baskonia que non destaca pola súa defensa dos uns e cabe esperar que coa ausencia de Vives volva dispoñer de minutos. Mellor pinta para a fin de semana no seu regreso a Zaragoza, equipo amábel cos bases —pico de Lapro na última xornada— e sumido en fonda depresión. Tampouco é de descartar que nun partido tan importante como o do Baskonia, Vidorreta aposte por outros xogadores que non son bases para exercer como tales e el dispoña de moi poucos minutos.
Coa lesión de Ponitka, queda unha praza libre que pode marcar a xornada. Esta semana non parece mala idea pensar nunha bandeira.
Sylven Landesberg segue ao seu. A visita do Zaragoza pinta a novo pico.
Tampouco hai motivos para dubidar de Gary Neal, no seu duelo coa á estrela do Estudiantes os gañadores deberíamos ser nós polas respectivas grandes valoracións de ambos. A fin de semana recibe o Valencia.
Nemanja Nedovic non valorou como se esperaba porque non xogou o que se esperaba, só 13 minutos. O Unicaja está a se xogar moito, Fontes do Sar é unha cancha complicada, así que non hai motivo para que non volva ter minutos e, nese caso, debería valorar moi ben polo seu gran momento e porque o Obra non destaca na súa defensa das ás. Despois xogará na casa contra o Barça, aí quererá mostrar a súa mellor cara e o Barça xa sabemos que é o rival soñado para as ás. Debe seguir.
En especial se Antelo segue de baixa, Ovie Soko semella unha aposta segura —23 na ida—, sen el volvería ter moitos minutos e xogaría de 4 a tempo completo. Debería ser boa opción incluso se volve. Leva tres grandes valoracións seguidas e o Fuenlabrada está a ter dificultades para defender a posición; así, todos os AP nas últimas xornadas fixérono ben contra eles: Thompson, Kelly, Shengelia, Suárez, Suton… Despois visita Gran Canaria, que tamén é un rival favorábel para el.
Coa lesión de Ponitka, Javi Beirán emerxe como a bandeira máis interesante da xornada. Xa contra o Unicaja superou a vintena de minutos de xogo e a quincena en valoración. Agora, enfróntase como local a un GBC que ten problemas para defender as ás. Cando Ponitka é baixa, a súa valoración media achégase á vintena. Na viaxe a Vitoria xa pode haber máis dúbidas con el, mais para esta xornada semella un valor seguro.
Un dos que reviviron coa chegada de Pesic foi o suomi Koponen, que está a xogar máis de 25 minutos de media. A última xornada foi o MVP do SuperManager —Neal valorou máis, pero non levou o bono— e agora enfróntase á peor defensa exterior da liga. Inda así, é unha aposta de risco, porque a súa valoración depende do acertado que estea no tiro. Na visita a Málaga as perspectivas xa non son boas.
Outro que depende do seu lanzamento para valorar ben é Kostas Vasileiadis, e por iso é unha opción de certo risco. O microondas grego está anotar moito na casa, case 19 puntos de media nos últimos tres partidos, e coa baixa de Ponitka ten que dar un paso á fronte. O GBC é unha defensa favorábel. Tamén sería unha aposta a só unha xornada.
Ponitka volveu ter problemas físicos contra o Unicaja unha volta despois. Só puido xogar o primeiro cuarto. Agás que o parte diga o contrario, temos que vendelo. Popovic estivo por debaixo das expectativas nun partido propicio. Coa viaxe a Murcia, cancha complicada e gran defensa das ás, toca esquecerse del. O Barça adoita conceder picos aos treses e podíamos pensar que Schilb é o principal candidato no Betis para absorbelo, porén, o xogador con pasaporte checo fóra da casa non está a render e leva desde a xornada 16 —Burgos— sen superar a vintena a domicilio. Semella mellor opción para cazaxornadas. Mumbrú estivo moi ben esta última xornada, mais anda con demasiada irregularidade como para consideralo para equipos da xeral; mellor para cazaxornadas. Como opción de risco para diferenciarnos podemos pensar en Carroll. Vén de gran valoración, nun partido no que case fai un dobre-dobre —9 rebotes— e a Penya é un rival propicio. Porén, xa sabemos que non é o xogador que valora con máis regularidade nun equipo con tantas opcións como ten o Madrid.
Tres opcións parecen claras trala baixa de Norel, o cuarto xogador marcará diferenzas. Bandeira si ou non?
Sen novidades con Ante Tomic. Novo pico por riba da trintena e agora xoga como local contra unha das defensas que máis conceden: Betis. A fin de semana visita Málaga. Alí fixo un 31 hai escasas semanas na Euroliga.
Tampouco Toko a Shengelia esta semana. Ten que seguir.
Deon Thompson gañou a pulso converterse na terceira mellor opción nos pivotes. Leva 9 partidos sen baixar da decena e os dous últimos superou a vintena. Enfróntase como local ao Andorra —16.8 na ida—, que é das defensas interiores que máis valoración conceden. O único pero que podemos poñerlle é que será moi complicado que o Burgos amplíe a tres a súa xeira de vitorias, o Andorra está nun momento fantástico, así que ten moi complicado o bono. Se esta pinta ben, inda mellor a próxima: visita a Sevilla, que é un dos equipos que peor defenden os catros —37.2 na ida—.
Carlos Suárez volveu amosarse como a opción axeitada para segunda bandeira a pesar de disputar, como Nedovic, poucos minutos. A visita a Compostela debería serlle favorábel, o Obra non é das defensas máis esixentes e xa na ida estivo na vintena. Máis dúbidas presenta a próxima xornada na visita do Barcelona, ten un gran precedente en liga —28.8— e un 11 en Euroliga hai poucas semanas. Todo indica que o debería facer ben, e por iso está aquí, pero non podo evitar ter a sensación de que a súa mala xornada está a piques de chegar.
