SuperManager x. 28: pesadelo sen fin

Balance da xornada anterior

Balance de la jornada anterior

A xornada estivo macada polos bases, as diferenzas foron enormes entre opcións a priori bastante parellas. No meu mellor repetín xornada terríbel (140.6 puntos), na que xuntei a Fisher (baixa non anunciada), Hannah e Tomic. Alá foi a tempada en dúas semanas, case 230 postos perdidos entre ambas e quedo xa ao bordo de saír do Top 500 (466º).

Selección da xornada

Selección de la jornada

A lenda é a seguinte: resaltados van os que son cota e de vermello os extracomunitarios. Os xogadores están listados por orde de preferencia. Podédesme seguir no Twitter para estardes ao tanto de novos artigos e de calquera modificación deste, se a houber.

La leyenda es la siguiente: en negrita van los que son cupo y de rojo los extracomunitarios. Los jugadores están listados por orden de preferencia. Me podéis seguir en Twitter para estar al tanto de nuevos artículos y de cualquier modificación que pudiera tener este.

En canto a planificación a dúas xornadas (a vindeira contaremos con 5 cambios), podemos ter en conta que xogadores non participan nesta (de Barça, Baskonia, Madrid e Murcia) para ver cales queremos recuperar. A priori, os máis interesantes para a volta son Facu, Tavares (este con máis dúbidas, porque dependerá das altas e baixas no Madrid), Shields, Poirier (veremos se Toko) e Heurtel. Esta semana non temos problemas de bandeiras, ao contrario, hai onde elixir.

Gran Canaria – Manresa

O Granca está nunha tendencia ascendente (librado xa da Euroliga) e o Manresa segue a competir de forma incríbel. A priori volvía ser un partido moi favorábel para os seus bases, Hannah e Fisher, pero ambos nos deron un desgusto a pasada. Clevin estivo moi desacertado e en consecuencia xogou menos do que o viña a facer, pero está nun gran momento e de local mellora moito até os 14 de media. Ademais, estivo ben na ida (18), despois ten unha saída favorábel á cancha do Estu e Oliver anda con problemas físicos. No caso de Fisher, o problema é que aínda que Peñarroya sabía que non ía xogar, no parte nin sequera aparecía como dúbida. Agora o parte di que está recuperado. Aí xa cada un ten que decidir se crer ou non. Se está, ten boa xornada nesta e mellor na vindeira de local contra o Murcia. No Manresa ningunha á nos está a ofrecer fiabilidade e o Granca defende ben a posición. Nos canarios cobra moito atractivo a opción Eriksson. O sueco de local está en 17 de media, vén en bo momento e o Manresa non é das defensas máis esixentes (16 na ida). Tampouco ten mala saída a vindeira. Por dentro ofrecen unha boa opción por cabeza. Wiley está a deixar moi boas sensacións (non na última xornada), de local mellora os seus números (case 18 de media) e a semana vindeira ten unha saída moi favorábel a Madrid. No Manresa o máis interesante é Lalanne. No cinco o Granca é moi vulnerábel (24 na ida) e na vindeira de local contra o Murcia ten partido para pico.

Breogán – Unicaja

McCallum semella que vai ser un dos protagonistas nos bases no que resta de tempada. Superou a quincena nos tres partidos que leva cos lucenses e a súa importancia no equipo non para de medrar (26 puntos anotados e 33 minutos de xogo na última xornada). O gran problema para súa inclusión é o calendario: nesta contra o seu ex, que mellorou moito na defensa do un coa volta de Díaz, e despois contra o Madrid. Con todo, creo que en ambos debería estar cando menos na quincena (o Madrid só conta con Facu no un). A pesar do gran nivel que deu contra a Penya, non consideraría a Díaz fóra da casa polo de agora (menos de 6 de media lonxe de Málaga). A baixa de Vidal debilita de forma apreciábel a defensa do Breo e deixa vía libre a Jaime (42 na ida) para ser unha das bandeiras predilectas da xornada. Despois tampouco ten mal partido de local (20 de media) contra o Burgos (23 na ida). Nestes momentos o Unicaja non ofrece nada fiábel por dentro (Suárez é dúbida) e no Breo destaca unha vez máis a figura de Gerun (oito semanas sen baixar dos 14 e 27 na ida). A semana que vén si que deberiamos desfacernos do ucraíno na visita a Madrid.

GBC – Joventut

A Penya está nun momento baixo da tempada, perderon ton físico e a defensa está a funcionar bastante peor, os novos non están a dar polo de agora o nivel dos que veñen a substituír. Para o GBC xa son todas finais, aínda que a situación é mellor que hai un par de meses (só están a unha vitoria do 16º). Lapro non están tan fresco, iso está a se notar a ambos lados da cancha (por iso podemos pensar en Pérez como bandeira sorpresa para cazaxornadas, nos últimos partidos os bases rivais están a valorar fácil). O arxentino non é tan fixo coma noutros momentos da tempada, pero ten bo rival e prescindir del é un risco moi alto porque é dos xogadores que en calquera momento pode dar un gran pico. A vindeira contra o Barça (14 na ida) xa haberá algún motivo máis para dubidar. É un bo partido para as ás, mais ningún dos dous equipos teñen xogadores que estean a valorar de forma consistente, así que McFadden, Zeisloft ou Nevels poden ser opcións para cazaxornadas pero non para equipos da xeral. Todorovic é o xogador máis fiábel do SM nestes momentos (17 xornadas seguidas sen baixar dos 12), contra Sekulic ten un partido para irse á trintena. Tal e como está incluso podemos pensar en mantelo contra o Barça. Beqa vén de fallar despois de moito tempo, mais coido que ten creto abondo: véñenlle dous partidos de local por diante (case 18 de media), a Penya no catro é máis abordábel e logo recibe un Obra que é unha defensa media. 

Burgos – Estudiantes

Ambos equipos son unhas defensas competentes dos uns de locais e a domicilio, respectivamente. Coa baixa de Gentile estamos a ver ao Brizuela máis pasador, a pouco que mellore a puntaría (0 de 8 en triplas nos dous últimos partidos) debería valorar moi ben esta semana. Despois recibe a visita dun Granca que defende bastante ben a posición (aínda así acadou a vintena na ida e de local ten 17 de media). Sutton ten un partido moi favorábel contra un Estu que sufre no catro, ten moita vantaxe por velocidade respecto a Nik e Suton. Despois ten unha saída complicada a Málaga. Unha opción de bandeira para esta (despois habería que vendelo) é Lima, que superou a Huskic na rotación nas últimas xornadas e leva un mes sen baixar dos 14. Inda que Caner-Medley vén do mellor partido da tempada, será moi complicado que repita un 5 de 7 en triplas (está a anotar un de media por partido) e fóra da casa os seus números baixan moito. Vexo mellor opción a un Whittington que defraudou na última, aínda que estaba a ser bastante fiábel (iso si, sen picos).

Obradoiro – Fuenlabrada

Os santiagueses fanse fortes no Sar e aos madrileños cústalles dar o nivel a domicilio. No Fuenla seguramente vexamos algunha boa valoración nos bases, mais está a ser unha lotaría acertar ao que lle vai tocar, así que non pensaría neles alén de cazaxornadas. Non son dos equipos que máis reciben das ás. Os máis sólidos están a ser Singler (5 dos últimos 6 en 12 ou máis) e Eyenga (os últimos 5 en 12 ou máis), ademais Llorca e Clark son baixa (se non se mete en problemas de faltas, xogará máis de 30 minutos). Por dentro as opcións están no Obra con Brodziansky e Llovet, os dous na casa son moi fiábeis (18 e 17 de media) e superaron a vintena na ida; trátase dun partido propicio para recuperen a boa liña tras uns últimos partidos convulsos. 

Valencia – Canarias

Os taronja recuperan a competición doméstica cos deberes feitos: título no peto e praza para a vindeira Euroliga. Pola súa parte, os canarios, a pesar da vitoria da última xornada, seguen lonxe do seu mellor nivel. Ningún dos dous equipos son esixentes na defensa dos uns. Van Rossom estivo a gran nivel en dous dos tres partidos da final da EuroCup, de local dobra os seus números até os 13 de media e cando non está Vives vaise aos 17 por partido. No Canarias o base máis en forma semella San Miguel tras dous bos partidos seguidos, aínda que é unha bandeira de risco. Beirán igual non está aínda para dar picos, pero segue a ser un seguro (12 partidos seguidos sen baixar da decena, incluídos os dous trala lesión) e foise á trintena na ida. Se buscamos a diferenciación, unha opción de bandeira con máis risco (está a valorar de forma irregular na ACB) é a de San Emeterio, que fixo unha final mangnífica (non fallou en ningún dos tres). Despois ten unha saída amábel a Zaragoza. De local tamén cobra interese Matt Thomas, que case duplica a súa media e eleva até case o 60% a súa porcentaxe de triplas de local. É uha opción de risco. Por dentro, a defensa do Valencia é moito máis efectiva ca do Canarias, así que esta semana daríalle un descanso a Iverson. Dubi, xa centrado na liga, preséntase como unha das opcións máis atractivas da xornada (18 na ida). Despois terá unha saída complicada a Zaragoza. Na final da Eurocup Will Thomas recuperou a súa mellor versión (foi o MVP) e pode facerlle moito dano a Abromaitis (aínda que pinchou na ida cun 3).

Andorra – Zaragoza

Interesante partido na loita polo Playoff. Após dúas malas xornadas (que sementas dúbidas) e a baixa da pasada polo nacemento de súa filla, Ennis volve ter unha xornada moi favorábel de local (máis de 18 de media). Ten un bo precedente da ida (18) e o aumento da familia adoita repercutir nun incremento da motivación. O Zaragoza recibe moita valoración no xogo exterior. Despois ten unha saída complicada a Canarias. Podemos  considerar a McCalebb para cazaxornadas, o Andorra é hospitalario, o macedonio medra a domicilio e nas últimas xornadas semella mellorou moito fisicamente. Okoye está nun momento espectacular e a defensa do Andorra é bastante máis amábel na casa (4 na ida); despois ten un encontro moi favorábel de local contra o Valencia. Trátase dun bo partido para os pivotes de ambos os dous equipos. Martín vén de facer dous grandes partidos e está a funcionar bastante mellor fóra (despois habería que vendelo porque recibe ao Valencia), aínda que non é o xogador máis consistente. Máis fiábel semella a bandeira de Diagne, de local está en 15.5 de media e leva seis partidos sen baixar da decena. É moi cedo para pensar en Tay Williams, que acaba de asinar polos maños.

O equipo do blog

El equipo del blog

O acerto nos bases (Campazzo e Heurtel) abondou para que Andrómenas tivese unha xornada decente (191 puntos) despois dunha caída interminábel. Gaño case 1600 postos até o 8058º da xeral. Que remate xa este martirio.

Cos cambios extra podía substituílos practicamente a todos. Deixo un sen gastar e meto ao equipo ideal da listaxe, coa única diferenza de Brodziansky no canto de Beqa. Teño que arriscar inda que sexa un chisco.

Material gráfico utilizado: a imaxe da cabeceira pertence á serie Rick & Morty.