SuperManager x. 9: os 200 existen

Balance da xornada anterior

Balance de la jornada anterior

A oitava foi unha xornada de moitos puntos… para os estándares desta estraña tempada. Para os meus equipos volveu ser un pouco como a pasada, tiven algúns nos que a cousa foi moi ben, mais no global baixaron máis dos que subiron. A miña semana estivo marcada polo segundo desastre consecutivo dun Lessort que estaba na práctica totalidade dos meus equipos. O mellor parado foi o que xa ía mellor clasificado. Tamén con Lessort e sen Dubi, superou os 200 puntos por primeira vez na tempada (203.4) cunhas entradas afortunadas: Lapro, Dawson e Radovic. Iso déixame, tamén por primeira vez no curso, dentro do Top 1000 da xeral: 629º.

Se ben establecera ao comezo un obxectivo moi ambicioso para o equipo do blog (Top 1000), non puxera ningunha meta para o que resultase o mellor dos meus equipos. Inda que a tempada pasada comezara moi ben, estivera no podio xa avanzado o xogo e conseguira manterme no Top 100 até case o final (rematei o 177º, peor clasificación de todo o curso), o meu nivel real é outro moi diferente. Non aspiro a mellorar aquilo. Para min un Top 500 xa estaría moi ben (algo que, agás o ano pasado, non lograra nunca).

Esta xornada a listaxe estivo marcada pola inclusión de Lessort e a exclusión imperdoábel de Dubi. Alén dese dúo, o resto non estivo mal.

Selección da xornada

Selección de la jornada

A lenda é a seguinte: resaltados van os xogadores que son cota e de vermello os extracomunitarios. Podédesme seguir no Twitter para estardes ao tanto de novos artigos e de calquera modificación deste, se a houber.

La leyenda es la siguiente: en negrita van los jugadores que son cupo y de rojo los extracomunitarios. Me podeis seguir en Twitter para estar al tanto de nuevos artículos y de cualquier modificación que pudiera tener este.

Renfroe e Ennis están a amosar unha fiabilidade total (só baixaron da decena nun partido cada un en todo o ano) e Laprovittola está a acadar o nivel estelar do ano pasado e garántenos unha trintena de minutos por partido. Se podemos acceder a eles, deberían ser os fixos durante un tempo pola tranquilidade que ofrecen. Se os cartos non nos chegan, está a emerxer a figura de Albicy tras un comezo por debaixo do esperado. Leva dous grandes partidos consecutivos contra rivais temíbeis, custa dous patacos, dá cartos, o Andorra está nun gran momento e xoga de local contra un Unicaja que sen Díaz está a ser unha defensa moi amábel cos bases. Con Llull sempre hai algo de incerteza de que descanse sen que o poidamos saber (xoga na casa, co que coñeceremos os descartes cando xa non haxa solución). Leva tres partidos seguidos xogando, está a valorar moi ben e aporta unha bandeira moi interesante. A semana que vén xogará seguro (agás lesión) porque se enfrontan ao Barça. Así que é un risco máis asumíbel esta vez. [Actualización: Laso di que está a traballar á marxe do grupo, polo que a incerteza con el medra de forma considerábel]. Habendo as opcións que hai, non pensaría nos bases do Barça, porque non é doado acertar cal dos dous vai estar atinado esta vez. Fitipaldo inda non baixou da decena como local e agora encadea dous partidos na casa contra rivais moi favorábeis. Huertas foi o mellor na hecatombe baskonista en Podgorica e debería ter moitos minutos (non está Granger e Vildoza anda con molestias) e o Granca está a ser dos equipos que máis conceden no un (chega Radicevic para axudar aí, inda que polo de agora non está dado de alta). Hannah o ano pasado fíxoo ben en Vitoria, vén dunha gran xornada en Euroliga e sen Granger o Baskonia sofre un pouco máis na posición. Aínda así é unha opción de risco, porque ningún base tivo unha gran actuación no Buesa este ano (o tope é o 13 de Santana). Outra opción de baixo custe é Van Rossom. O belga, despois dun arranque complicado, leva dúas boas valoración nos últimos tres partidos e ten un calendario moi favorábel por diante. Iso si, xoga fóra (onde non chega aos 3 de media no ano). McCalebb tamén ten unha saída favorábel a Lugo, mais vén de pinchar e anda con algúns problemas físicos. Ao prezo ao que está só deberiamos pensar nel se xa o temos no equipo e contamos con cambios máis urxentes.

No particular, teño poucas dúbidas con Jaime. Agora ben, quen non o teña xa no equipo pode esperar unha xornada máis para darlle entrada polos problemas físicos que arrastra. Tamén haberá quen pense en vendelo e aproveitar eses cartos para investilos noutras posicións. Eu, agás nova información, vouno manter nos meus. Beirán non é unha opción tan atractiva, pero tamén semella que vai xogar e nese caso non é unha venda prioritaria (se temos cambios, podémolo contemplar). Pode facelo ben. Se non está nos nosos equipos, entón si que non lle daría entrada esta semana. Inda que Brizuela a xornada pasada marcou o seu mínimo de minutos na tempada (21), segue a anotar con consistencia e o rival da semana é favorábel: o Barça é das defensas máis amábeis coas ás (os tres xogadores que superaron os 20 contra eles este ano xogaban aí). Eu quedaría con el. Se decidimos vender a algún dos anteriores, a opción Marc Garcia pinta ben. Está a aproveitar os seus minutos, apórtanos unha bandeira, debería ir a máis, vén de ser o mellor do Fuenla en Europa e asegúranos unha boa suba. Blazic que este ano volve ser un todo (37.2 esta última) ou nada (-3 na anterior). O Estu é un rival propicio para os que queiran tirar a moeda ao ar [Actualización: o Barça deu de baixa a ficha de Kuric para a xornada, así que Blazic debería ter maior peso]. Seibutis chega en moi boa dinámica e vai dar cartos; porén, o Breo non lle está a pór as cousas doadas en Lugo aos treses. Pode cumprir arredor da decena, mais non esperaría moito máis del esta semana. Cancar ten dous partidos seguidos de local e está a dar un salto adiante esta tempada. Porén, xoga contra dous equipos que están a defender ben a posición, está xa preto do millón e non proporciona bandeira, co que semella que hai opcións máis atractivas. Como opcións menos habituais para cazaxornadas contemplaría a Doyle, Redivo, Eyenga (contra a Penya vive na vintena) e Gentile (seguro que contra o Barça quererá exhibirse). Ao prezo no que se atopa McFadden, a pesar da gran xornada europea, é complicado pensar nel.

A pesar da mala xornada pasada e a incerteza que pode implicar o —sorprendente— cambio de adestrador, Shengelia segue a ser fixo para min. Dubi foi un dos xuíces da xornada. Se tivemos o bo ollo de levalo, tamén debería quedar aí fixo. Se inda non o tiñamos, igual podemos esperar unha semana máis para darlle entrada. Está moi caro e xoga fóra contra un rival complicado. A semana que vén xa si que a súa presenza debería ser ineludíbel, volve a Valencia (dous partidos seguidos) e ten un rival moi favorábel. Xa dicía a semana pasada que nesta habería que apostar por Thompson. Está en bo momento e de local os seus números dispáranse (véñenlle dous seguidos na casa). Jordan aparece como un dos interiores máis interesantes: o Zaragoza é un dos equipos que máis concede na posición e é moi posíbel que ademais conte coa baixa de Fran Vázquez (xa está confirmada). O xamaicano está na vintena de media como local. En só 17 minutos a xornada pasada Tavares achegouse á trintena. O risco de sorpresa desagradábel está aí, mais co Barça a semana que vén podemos apostar por el a dous partidos se temos necesidade desa bandeira. Nesa opción de cota destaca un Llovet no seu mellor momento: encadea tres partidos consecutivos na vintena e vai a Murcia, unha das peores defensas interiores. Outro que está en gran momento é Radovic, debería cumprir pero non me gusta tanto como na xornada pasada. A bandeira de Todorovic está moi económica e pinta moi ben esta semana. O montenegrino está a ir a máis (é un xogador diferencial a estes niveis), rendeu moi ben a semana pasada e repite de local contra un rival favorábel. Ademais, Birgander anda con problemas físicos e iso debería facer que xogue por riba da vintena de minutos. Iverson ten un partido complicado na visita do Valencia, mais está a se amosar moi sólido e non é venda obrigada. Ao xogo interior do Unicaja xa lle puxen a cruz despois do das dúas últimas xornadas, así que eu non vou apostar por eles (co que a lei de Murphy di que o MVP vai saír de aí); mais xa era unha xornada propicia para eles e coa probábel baixa de Diagne no Andorra inda o debería ser máis (Suárez está a ser o máis consistente). Tomic nalgún momento terá que facer un bo partido, igual toca na cancha do Estu. Queda como opción para afoutos [Actualización: o Barça deu de alta a Singleton, así que hai un xogador máis entre os que repartir os minutos interiores —e os lanzamentos—]. Parecía que a semana pasada sería a derradeira xornada de W. Thomas nos equipos, mais estivo ben e os que vaian inda moi necesitados de cartos esta semana poden recoller unha última suba (nos demais xa non pensaría nel). Non entra na listaxe, mais quero nomear a Burjanadze. Alégrame moito o seu último gran partido após o calvario que pasou coa lesión. Era un dos xogadores con maior progresión da ACB e oxalá que siga a súa evolución e nunhas semanas xa o podamos comezar a considerar como opción para os nosos equipos.

O equipo do blog

El equipo del blog

Andrómenas tamén tivo a inestimábel achega de Lessort. A pesar do francés e da venda de Tavares para meter a Shengelia xusto no día que fallou, os outros dous cambios funcionaron. Investín unha morea de cartos en dar entrada a Jaime e a cousa saíu ben co seu tope da tempada. Iso deixábame moi poucos cartos para completar o equipo cun base, mais acertei e o 14.4 de Van Rossom soubo a gloria. Quedei sen cambios para meter a Dawson por Thomas (substitución que fixen en todos os equipos nos que puiden). Os que entraron sumaron 33.6 puntos máis que os que saíron. Así que a semana volveu ser positiva. Os 163 puntos permitíronme gañar 4 mil postos e situarme no 21728º. Máis de 30 mil postos gañados nas últimas catro xornadas. O obxectivo segue moi lonxe, mais a tendencia xa é diferente.

Entra ese Dawson por Thomas que tiña pendente, Lessort sae propulsado (que 30 máis doloroso se vai marcar) e para poder meter a Thompson no seu sitio teño que cambiar a Van Rossom por unha opción de inda máis baixo custe: Albicy.

Material gráfico utilizado: a imaxe da cabeceira pertence ao Dr. Slump e Arale (Akira Toriyama, 1981).